Karta Popular: Ejijensia Komunidade Suco haat (4) iha Sub-distrito Pante Makassar no Oesilo ba Governu no Parlamentu

Intrudusaun

Iha loron 20-23 Abril 2010 Luta Hamutuk hala’o aktividade briefing iha Distrito Oekussi sub Distrito Oesilo no Pante Makasar iha Suco haat (4) hanesan Bobocasse, Usitasae, Bobometo no Naimeco. Iha aktividade Briefing ne’e Luta Hamutuk desimina informasaun liu husi materia mak hanesan Fundu petroliferu, EITI, Orsamentu Geral do Estadu no partisipasaun komunidade ba dezenvolvimentu.

Durante prosesu diskusaun community briefing iha distrito Oekusi komunidade hato’o sira nia prekupasaun no ejijensia ba problema mak sira infrenta, liu-liu problema mak relasiona ho prosesu dezenvolvimentu ba Luta Hamutuk hodi hato’o ba Governu no Parlamentu Nasional. Bazeia ba prekupasaun no ejijensia komunidade iha suco haat (4) nee liu husi karta popular ida ne’e Luta Hamutuk hakarak diriji ba Governu no Parlamentu Nasional hodi toma medidas ba Komunidade nia prekupasaun no ejijensia hanesan tuir mai ne’e:

1. Komunidade sira ejiji hodi halo ponte ba mota Bilomi, mota Kul-umu no mota Noel- Ekat tamba mota hirak nee mak liga suco sira iha sub distrito haat (4) hanesan Pante Makasar, Oesili, Pasabe no Nitibe. Waihira mota hirak ne’e la iha ponte difikulta komunidade sira hodi halao’o sira nia aktividade iha tempu udan.
2. Komunidade mos prekupa tebes kondisaun Estrada mak liga suco Naimeco ba Usitasae no Bobometo nia kondisaun ne’ebe difikulta mobilidade transporte ba suco hirak nee, Tamba durante ne’e kareta bo’ot hanesan truck deit mak bele asesu.
3. Populasaun iha Suco haat (4) susar hodi asesu be’e mos, tamba ne’e sira ejiji ba Guverno hodi halo kanalizasaun ba be’e matan mak sira iha hodi liga ba fatin publiku no komunidade sira hela.
4. Autoridades lokal sira laiha informasaun bainhira projetu ruma tama iha sira nia fatin. Por ezemplo: projetu pakote referendum nebe mak implementa kona-ba pengerasan estrada iha suco Bobometo laiha koñesementu ba autoridades local sira nune defikulta sira hodi halo kontrolu.
5. Lider komunitariu iha suco bobometo mos kestiona trabailhadores sira mak mai husi estranjeiro (Kefa no Atambua) nebe implementa projetu pengkerasan estarada(pakote referendum), no kompania sira la rekruta trabailhadores local iha suco Bobometo.
6. Lider komunitariu sira mos kestiona ona kona ba televizaun suco mak at no to agora la iha manutensaun, kadeira suco laiha, mesin tik mak aat.
7. Lider komunitariu mos hato’o prekupasaun kona ba Subsidiu suco nian nebe mak durante fulan haat ona seidauk simu(Janeiro-Abril 2010). Inklui surat tahan no espidol ka operasional suco laiha. Sira ejiji mos kelengkapan dapur suco, bikan, sana, kanuru no sel-seluk tan hodi fasilita suco nia aktividades.
8. Komunidade iha Suco Bobometo, husu ba Guverno liu-liu Ministeriu Turismo, Comersio e Industria hodi fo fila sira nia osan $ 4.90 nebe mak sira uza hodi selu transporte hodi tula fos MTCI ret 5 ba iha sira nia suco. Sira dehan katak guverno promete ona atu fo fila sira nia osan maibe to’o agora sira seidauk selu.

Posijaun Luta Hamutuk

Bazeia ba prekupasaun no ejijensia komunidade ne’e Luta Hamutuk hakarak hato’o nia posijaun liu husi karta popular ne’e hanesan tuir mai:

· Prekupasaun no ejijensia nebe mak komunidade iha suco haat (4) nee kestiona nee hatudu katak durante nee la iha transparante relasiona ho fundu peroliferu no orsamentu geral do stadu

· Prekupasaun no ejijensia nebe mak hato’o ba Luta Hamutuk ne’e hatudu katak durante nee komunidade la iha kanal hodi kanaliza sira nia problema mak durante nee sira infrenta

· Prekupasaun no ejijensia komunidade iha leten ne’e hanesan indikasaun diak tamba povu komesa kestiona problema transparansia no akuntabilidade ba governu nebe mak hanesan jestor ba sira nia riko soi

Rekomendasaun

Bazeia ba prekupasaun no ejijensia komunidade iha suco haat nee Luta Hamutuk hakarak hato’o rekomendasaun ba Governu no Parlamento Nasional. Rekomendasaun hirak ne’e hanesan tuir mai:

· Rekomenda ba Premeiro Ministru RDTL nebe hanesan xefe do Governo atu fo atensaun ba nia Ministeriu mak nain ba projeitu kapital dezenvolvimentu atu informa ba autoridade local iha distrito Oekusi antes implementa projeitu.

· Rekomenda ba Ministeriu Infrastruktura atu hatama ejijensia komunidade kona ba ponte mota Bilomi, mota Kul-umu no Noel Ekat nebe liga suco sira iha sub Distrito Pante Makasar, Oesilo, Pasabe no Nitibe iha planu orsamentu geral do estadu anu fiscal 2011.

· Rekomenda ba Sekretariu do Estadu Eletrisidade e Agua Saniamentu atu toma medidas ba ejijensia komunidade suco haat nee nian nesisidade be’e mos hodi tau iha planu orsamento geral do estadu anu fiscal 2011.

· Rekomenda ba Ministeriu hotu mak nain ba projeitu kapital dezenvolvimentu nebe sei implementa iha distrito Oekusi tengki fo hatene ba implementador projeitu/kompania sira atu fo koñesemento ba autoridade local sira antes implementa projeitu atu nune lider komunitariu sira bele partisipa hodi halo kontrolo ba prosesu implementasaun projeitu.

· Rekomenda ba Ministeriu Administrasaun Estatal e Ordenamento Territoriu atu tau atensaun ba lider komunitariu iha suco ha’at mak durante fulan janeiru to abril seidauk simu subsidiu.

· Rekomenda ba Ministeriu Administrasaun Estatal e Ordenamento teritoriu atu tau matan no halo monutensaun ba fasilidade suco mak a’at hanesan televisau no fasilidade mak la iha iha suco ha’at mak Luta Hamutuk hala’o aktividade community briefing.

· Rekomenda ba Ministeriu Comersio e Industria atu selu komunidade nia osan mak seidauk selu hodi aluga kareta tula fos ba sira nia suco.

· Rekomenda ba Parlamentu Nasional nebe hanesan representante povu atu tau atensun ba prekupasaun no ejijensia komunidade nian waihira iha debates orsamentu ratifikativu no orsamentu geral do estadu anu fiscal 2011 atu nune bele kosidera prekupasaun no ejijensia komunidade suco haat nee iha prosesu debates orsamentu.

Mak nee deit karta nee ami hato’o, ba ita boot sira nia atensaun ami hato’o obrigado wain.

Dili, 28 Abril 2010

Mericio Akara

Diretur Luta Hamutuk (+670) 7263783)