Investimentu Industria Extractivu “Mega projectu tasi Mane” Versus Kria kampu servisu no redusaun desempregu iha Timor-Leste

Autor: Nelson A. Seixas Miranda

Peskizador Luta Hamutuk Insitute

Prosesu atividade industria Extractivu iha Timor-Leste, kompostu husi atividade hanesan perfurasaun ba rekursus, liu-liu ba rekursus minarai no gas nian; Aktividade minarai   Timor-Leste fahe ba iha area 3, mak hanesan: 1) Area rai maran (Onshore) Timor-Leste nian; 2) Area Tasi Exclusivu Timor-Leste [offshore/Zona Ekonomia Exclusivu (ZEE) tasi Ttimor-Leste], area ida ne’e tuir Tratadu Tasi Timor (TTT), iha Estadu Timor-Leste nia administrasaun no mos nudar area/zona ekonomia Timor-Leste nian, ne’ebé aktividade iha area ne’e 100% Estadu Timor-Leste nia direitu, kontratu ba iha area ne’e otomatikamentu fahe ho estadu Timor-Leste; ba area 3) Area dezenvolvimentu Konjunta/Joint Development Minarai  Area (JPDA); Ba iha area ne’e, tuir Tratadu Tasi Timor Timor-Leste define ona kria area servisu konjunta ida hamutuk ho Nasaun Australia. Area ne’e nudar inisiativa kreativa entre nasaun Timor-Leste ho Nasaun Australia, tanba nasaun rua ne’e seidauk deside nia fronteira maritime frontal no mos lateral. Tuir Tratadu Tasi Timor depois de tinan 50 mak foin hahu fila fali negosiasaun ba fronteira Maritima frontal no lateral entre nasaun Timor-Leste ho nasaun Australia[1].          

Atividade minarai  iha Timor-Leste, tantu iha tasi laran (offshore) no mos iha rai maran (Onshore) nian kompostu husi: Atividade Upstream ho nia distribuisaun/Downstream nian, aktividade upstream ba minarai no gas dau-daun iha tasi Timor hala’o iha tasi laran (offshore), atividade ne’e hala’o iha area konjunta/JPDA nian, liu-liu hala’o iha possu mina matan 2: Possu Bayu Undan no possu KITAN, aktividade iha fatin rua ne’e, kada loron produ minarai hamutuk 174.000bpd; produsaun gas nian hamutuk 95000tcf kada loron[2]. Hodi kompleta aktividade minarai  nian iha Timor-Leste, Estado/Governu Timor-Leste iha ona planu bo’ot hodi harií industria downstream iha Timor-Leste, industria ne’e tuir planu Governu Timor-Leste harií iha Costa Sul Timor-Leste

Implementa planu industria Minarai  iha Timor-Leste, Governu Timor-Leste ho nia planu bo’ot tuir Palnu Estrategia Dezenvolvimentu Nasional (PEDN) ba 2030[3] hodi harií industria Extractive iha Timor-Leste, planeiamentu mega projecto ba industria Minarai no gas hatudu komitmentu husi Governu Timor-Leste atu dezenvolve Costa Sul sai hanesan Zona Ekonomia Espesial ba seitor industria minarai no gas. Aktividade minarai ne’e sai motor de aranka/motor penggerak signifika katak, Dezenvolvimentu iha “Seitor industria Mina no gas sai fontes reseita principal ba Estado nune’e bele hamoris dezenvolviementu nasional ba seitor sira seluk, nudar faktor determinante ba dezenvolvimentu Ekonomia Timor Leste”. Tanba reseitas husi seitor seluk seidauk bele sai baze ba rekursus despesas ba dezenvolvimentu nasional no mos bases ba dezenvolvimentu ekonomia Timor-Leste nian. Seitor minarai no gas sai hanesan rekursu uniku atu Suporta seitor seluk nune’e futuru seitor sira hanesan Agrikultura, SAUDE, Edukasaun sei fo retornu ekonomia no social inklui rekursu humanu, realidade hatudu katak iha tinan 10 nia laran ne’e Timor-Leste ekonomikamente sei depende liu ba reseitas husi industria Minarai no gas nian[4]  

Nudar aksaun real hodi implementa industria ne’e iha tinan 2008, IV Governu Timor-Leste, liu husi Sekertario Estdao Rekursus Naturaais (SERN) hato’o proposta/planu asaun annual ba Parlamentu Nasional hodi hahú halo estudu ba industria Suai Supply Base (SSB) iha Distritu Covaliam, industria Refinaria iha Betanu-Distritu Manufahe no Planta LNG iha suku Beasu- Distritu Viqueque. Implementasaun industria ne’e ho intensaun atu garante no aselera prosesu dezenvolvimentu Industria Extractivu/industria Minarai no gas iha Timor-Leste, tanba nasaun Timor-Leste nudar nasaun ne’ebe mak iha nia rikusion mina rai no gas barak; Hodi garante prosesu ne’e tomak, iha tinan 2011 Ministeriu Minarai  rekursu Minrais (MPRM) aloka ona orsamentu Milloens US$ 31,100 hodi hodi finansia dezenvolvimentu Aeroportu, Estrada, Ponte no-mos infrastrutura industira minarai no gas ne’ebé sei harii iha Tasi Mane, liu-liu ba iha distritu Covalima. Hodi haforsa liu tan prosesu estabelesimentu indutria ne’e, iha tinan 2012 IV Governu Timor-Leste aumenta alokasaun orsamentu ba indutria ne’e hamutuk Milloens US$162,800 ba Projectu Tasi Mane. Aloaksaun orsamentu hirak ne’e, nudar komitmentu Governu nian hodi alkanza inisiativa hodi harii industria extractive nian iha Timor-Leste  

Iha tempo mak hanesan, Ministeriu Minarai rekursus Minerai (MPRM), aloka orsamentu hodi hasae kualidade rekursu humanu ne’ebé kualifikadu, nune’e bele hola parte/partisipa iha dezenvolvimentu indusria Minarai nian iha Timor-Leste, iha tinan 2011 no 2012 Ministeriu Minarai fo Bolsus de estudus ba Timor-oan sira hodi kontinua sira nia eskola ba rea minarai nian, iha universidade oioin iha rai liur (Indonesia, Australia, Neva Zelandia, Malaysia, India, Filiphina, USA, Thailandia, Japaun..sst). Orsamentu mak aloka hodi finansia bolseiru sira ne’e, hamutuk Millioens US$ 11,874 iha tinan 2012 no aumenta iha tinan 2013 sai Milliaun US$ 23,620[5]; Maibe realidade mak Timor-Leste hasoru, estudantes graduado sira nebe mak eskola ba petroleum nian barak mak to’o agora seidauk hetan servisu, tanba ministeriu rasik la fosinal positive ba sira, maske governu iha ona planu ba Industria tasi mane (signifika Ministeriu minarai la dun iha planu ne’ebé mak integradu hodi simu estudante sira ne’e akaba sira nia estudu). Maske iha ona programa bolus estudus ne’e, maibe husi Ministeriu Minarai rasik ladun hatudo sistema makanismu controlo ba bolseiru sira la dun efectivu, tanba ne’e, ministeriu rasik labele konsege simu estudnates sira mak akaba ona sira nia estudu.

Corridor investimentu Petroleu iha Tasi Mane

Hahu husi IV Governu Timor-Leste, tau as prioridade iha dezenvolvimentu industria extractive/industria Minarai [6]

Industria/projectu Petoleum ba Costa Sul/Tasi mane sei sai prioridade principal atu dezenvolve/estabelese industria “Suai Supply Base (SSB) iha distritu Covalima; estabelesementu industria Suai Supply Base (SSB) nudar parte husi preparasaun kondisaun Timor-Leste atu partisipa iha industria Minarai no gas, preparasaun ne’ebé mak halo ona husi Governu  hanesan: Governu hahu halo estudo konseptual ida hodi harí industria Suai Supply Base, bazeia ba estudo ne’e identifika ona fatin hodi harí Supply Base, fatin supply base ne’e iha Suku  Camanasa-Aldeia Fatuisin no Aldeia samfuk nia area.

Prosesu ba estabelesementu mega projectu (Suai Supply Base) Tasi Mane;  

Prosesu ba estabelesementu industia Suia Supply Base, dadauk komesa ona ho alokasaun orsamentu hodi harii Suia industria supply Base ne’e. Alokaasaun orsamentu ne’e tuir planu governu sei finansia ba implemnetasaun projectu “estabelesimentu Mini Suia Aero portu no Portu maritime Suai, Centru Bisnis-Suai, Nova Cidade de Suai

Industria Suai Supply base sei okupa rai hamutuk 1300 hectares, ne’ebé sei hamout/halakon area ba agrikultura nian, mas iha ona planu ne’ebé mak diak husi prespektiva guvernu mmaibe to’o agora komunidade iha distritu tolu ne’ebé mak sai tarjeitu ba industria ne’e rasik seidauk iha serteja ba informasaun no mos planu estabelesimentu mega projectu ne’e, seidauk serteja ba retornu saida mak kumunidade sei hetan, oinsa partisipasaun kumunidade iha industria hirak ne’e, saida mak komunidade sei suporta ba industria ne’e, tanba seidauk iha sinyal positive husiu Estadu, liu-liu Governu ba komunidade nia partisipasaun ne’e. Industria Refinaria, bazeia planu Governu Timor-Leste sei harii industria Refinaria iha suku Betanu, Distritu Manufahi, industria ne’e ho nia kapasidade ba distilasaun petroelu hamutuk 300mlbr kada loron, indutstria ne’e iha relasaun metin ho industria Planta LNG  ne’ebé mak sei harii iha suk Beasu-Distritu Viqueque; Industria hirak ne’e depende ba rezultadu husi negosiasaun ba pipeline husi posu greater Sunrise nian

Projecsaun Orsamentu ba projectu Tasi Mane

Bazieba Planu Estrategia Dezenvolvimentu Nasional (PEDN) 2011-2030. Iha livru OGE 2012 No 6 (Fundu Iinfrastruktura) Governu ho nia projecsaun investimentu ba projectu tasi mane liu-liu ba projecto Supply Base-Suai ho husi 2011 to’o 2015 ho total orsamentu hamutuk Milliuan US$ 738.926; Alocasaun OGE Actual ba projecto ne’e nian hamutuk milliuan US$ 18.925, ba tinan 2011 orsamentu ba tasi mane hamutuk milliaun US$ 18.925 no tinan 2012 hamutuk milliaun US$ 162.800.

Dezenvolve industria Extractivu iha tasi mane sei abu-abu nafatin, tanba Governu liu husi MPRM, iha orsamentu ratifikasuan tinan 2012 nian hasai tan fali Orsamentu ba Projectu Tasi Mane, liu husi Orsamentu Rektifikativu (Hamutuk Milliaun US$ 50), redusaun ba orsamentu ne’e sai perguntas bo’ot ida, Gvoernu hatudu la iha komitmentu hodi dezenvolve iindustria ne’e, nune’e ita komeza hanoin, governu liu husi MPRM gasta orsamentu deit no laiha konsistensia husi governu hodi implementa planu ne’ebé mak halo tia ona.  Orsamentu ne’ebe hasi mai husi: Projectu Tasi Mane nian: Liu-liu Orsamentu ba projectu Ponte no Estrada; Milliaun US$ 30 no Industria Petroleu gas nian Milliaun US$ 20

Iha 2011 aloka ona osan hamutuk 31 milhoes: hodi hari’i Portu Maritima: ho nia montante orsamentu hamutuk US$2,5 milhoes de dolar Amerikanu. Ba industria Supply base nian ho montante hamutuk US$10 milhoes. Iha alokasaun ne’e mos hodi halo site survey, design no supervizaun ba industria ne’e hamutuk US$5,8 milhoes. Iha mos alokasaun ba analize rute pipeline nian ne’ebé hamutuk US $3,5 milhoes. Atu kompleta industria ne’e, governu mos aloka ona orsamentu hamutukUS $2.8 milhoes ba Estudu ambiental nian  

Investimentu Industria Supply base versus kampu servisu no redusaun desempregu iha Timor-Leste

Industria supply base ne’e harii atu soporta aktividade industria minarai iha tasi Timor. Atu alkanza industria minarai ne’e Governu Timor-Leste inisia atu dezenvolve industria minarai  iha parte tasi mane Timor-Leste nian, hanoin industria ne’e sei fo impaktu ekonomia ne’ebé positive tebes, signifika industria ne’e sei kontribui rendimentu ekonomia ne’ebé bo’ot ba Estadu Timor-Leste. Ho industria supply base ne’e sei loke oportonodade ba investor husi rai liur mai investe iha Timor-Leste, liu-liu investe iha industria minarai no hanoin investor sira ne’e sei loke kampu servisu barak ba kumunidade iha area refere nomos komunidade Timor-Leste tomak, nune’e bele redus numeru desempregu iha Timor-Leste.

Hodi garante investor sira mai Timor-Leste, Governu ho nia  Plnanu dezenvolvimentu nasaional tau as prioridade ba dezenvolvimentu indutria minarai; Industria ne’e sei focus ba iha Tasi Mane “ne’ebé ho naran mega PROJETU TASI MANE”: Mega projectu hirak ne’e mak kompstu husi : Industria Suia Supply Base (SSB); industria ne’e kompostu husi projectu atu harii Portu maritime ida, harii mos bairo foun/Nova Cidade deSuai, dezenvolve Aeroportu ida iha suai hodi bele kontribui ba industria Extractivu no harii taman/kebung binatang/fatin hodi hakiak Lafaek. Bazeia planu Governu, Industria ne’e sei harii iha Distritu Covalima, Suku Camanasa no okupa rai hectares 208

Industria Supply Base-Portu/Baze de apoiu: Industria mak estabelese hodi fo apoia lojistiku ba industria Minarai, Industria ne’e harii husi: Portu maritime ida ho funsaun barak, fatin ne’e hodi rai material sira hodi fasilita prosesu Industria Minarai iha Timor-Leste (Rai maran no mos iha tasi laran).

Nova Cidade de Suai: Sei loke bairo foun, harii fasilidade hanesan (uma, fatin komersio nian..sst) hodi fasilita hela fatin(Uma) no Centru negosio kiik ba trabalhadores mak servisu iha Supply base no ba komunidade sira ne’ebé mak afetadu husi industria ne’e.

Perparasaun ba industria Suai Supply base (SSB): Iha tinan 2009-2010 hahú hala’o Estudu Konseptual ba mega projectu ne’e. Tinan 2010 to’o 2011 kontinua halo Estudu viabilidade Detailladu nian (Estudo Tékniku/Komérsiu, FEED ba Suai Supply Base-Portu ), hala’o ona Spatial Design ba Nova Cidade Suai ho kompletu. Agostus 2011 Konsellu Ministru aprova Projetu Suai Supply Base. Ministeriu Petroleu Rekursus Minerais (MPRM) kria “Forma Ekipa Konjunta Interministerial no mos Autoridade Lokál” hodi halo sosializasaun ba liberta rai no propriadade

Etapa iha konstruksaun industria Suai Supply Base (SSB); Fahe ba etapa 3

Baze suporta ba Industria Minarai no Gas”(Faze primeiru presiza tempu fulna 18 to’o fulan 24 nia laran) Harii uluk “Breakwater”: Parede naruk iha tasi laran, nune’e atu harahun laloran tasi antes to’o mai iha portu. Harii portu/Ponte-Kais (Jetty) baraka ba ro sira mai atraka. Harii Edifisiu (office block), Armajen (Warehouse), Tanki liquidu (storage tank) Espasu Livre (Open Yard) no Minishorebase

Baze suporta Rekursu Minarais & Enerjia Espansaun ba “Breakwater”/parede harahun laloran, Espansaun ba Ponte-Kais (Jetty,Exporta no importa industria Minerais, Fasilidade tranka Ro bo’ot ho kapasidade 30,000 DWT

Implementasaun/harii Portu Integradu (All Cargoes) Espansaun ba Parede harahu laloran, Fatin no Terminal ba kontentor, Terminal no Ponte Kais ba Pasajeiro Ro bo’ot Bele mos sai Fatin no Terminal ba Industria Peskas. Mega Projectu Refineria/Petrokimiku-Nova Cidade Betano: Harii iha Suku Betano, distritu Manufahi.Mega Projectu hodi Planta LNG, nova cidade Viqueque no Beaco: Harii iha suku Beaço, distritu Viqueque.Projectu Auto-Estrada (Highway) liga entre distritu Covalima-Manufahi-Viqueque, fasilita konstrusuan industria Minarai

Durante Faze konstruksaun Kria Kampu Servisu Direta (±300 Vaga Servisu) Timor oan sira ne’ebé sei involve iha faze ne’e presiza skill/matenek oioin hanesan: - Presiza ema ne’ebé iha Skill ne’ebé as/High skill ho nia servisu mak: Enjineriu, Ekonomista, Accountant..sst; -- Ba Medium skill ho nia servisu: Tekniku Profesionais, Mandor, Mekaniku...sst; -- Low skill ho nia servisu nudar : Motorists..sst; -- Ba Ema ne’ebé mak la iha skill liu/Unskill ho nia servisu mak nudar: Ajudante, Security, Cleaner..sst. Faze operasaun, sei kria kampu servisu Direta (±272-370 Vaga Servisu); ±200-250 Timor oan servisu direta iha operasaun SSB, ±72-120 servisu ho Operador mak aluga Minishorebase. 

Servisu iha SSB: Jestaun, operasaun, manutensaun, Seguransa no Meu-ambiente, Rekursu umanu, Finansa, Busines support, Security...sst. Ho nia skill ne’ebé tenke prienje mak hanesan: -- High Skill: Sei loke vaga ba National no Lokal; -- Medium Skill Sei loke vaga ba Lokal no National; -- Low Skill: Sei fo prioridade ba ema local; -- Unskill: Sei fo prioridade ba ema local. Estimasaun Governu nian ba Mega projectu sei kria kampu servisu lndireta (±1000-1500 Vaga Servisu) ba “komunidade lokal/Kontaktor Lokal” sira hodi suporta ba projeitu ne’e: Fornesementu hahan; Transporte; Laundry/Fase Ropa..sst 

Kria Kampu Servisu (±1000 Vaga Servisu). Kontinua kria servisu indereta ba industria foun: Fabrikas, Industria Agrikula, Industria Turismu, Induztria ba peskas; Ho estimasaun Kampu servisu ±10,000 vaga servisu. Industria sei kria oportunidade negosiu: 1) Konstrusaun nian (Fabrika Batako,Karpintaria..sst); 2)Hospitalidade (Hotel, losmen, salon, travel agensia, sst); 3)Fatin ba han no Hemu (Restaurante, Bar, kantina, sst); 4)Komersi (Supermerkadu, lojas, stasaun ba mina); 5)Offeresionamentu (Produtu local); 6)Investimentu hosi Rai Liur (Banku, Telekomunikasaun, sst)

Bazeia ba planu governu nian ne’e, ekipa industria mega projectu tasi mane mak administra husi Ministeriu Minarai e Rekursus Minerais, halo ona nia work plan ba Projectu Tasi Mane no nia Politika Orsamental hodi finansia industria ne’e[7]. Ministeriu Minarai e Rekursus Minerais servisu tuir planu mak iha, planu servisu ba industria tasi mane nian ne’e fahe ba fase rua;

Fase primeiru, projectu tasi mane nian ne’e sei hahu realiza husi tinan 2011 to’o 2013: iha periodu ida ne’e tuir planu governu nian sei harií: Fase da plataforma de abastecimento, ( ba fase ne’e governu aloka ona orsamentu hamutuk Milliaun US$ 31.100) hodi harií plataforma ida ba fatin fornesementu sasan no material ne’ebé mak sei kontribui ba prosesu konstruksaun industria minarai no gas nian iha tasi mane (projectu tasi Mane nian). Fatin fornesementu ne’e inklui iha industria Supply base nian Atu halo Konstrusaun ba Porto Maritima nian; Harií mos Armazenamentu iha Suai Rehabilitasaun ba Aeroporto Suia Konstrusaun ba Estrada ne’ebé liga entre Suku Camansa ba Suai

Fase segundu nian husi tinan 2013 to’o 2015: tuir planu governu nian iha tinan 2013 to’o 2015 nia laran kompleta ona plataforma de abastecimento ne’e, fatin protejidu ekoligico nian harii ona no mos sei Aumetu tan area transporte Komercial nian ne’ebé mak sei fasilita sirkulasaun transportasaun ba industria tasi mane ne’e iha suai laran no mos transporte ne’e sei liga ba diastritu sira seluk, mak iha parte Costa Sul nian, iha period ne’e Governu harií ona ka iha ona konstrusaun ba Nova cidade de Suai nian (Fatin ba trabalhadores ba industria supply base nian, sei harií iha suku Belekasak, Labarai)

Hodi kompleta prosesu hirak ne’e, iha tinan 2012, Governu liu husi Ministeriu Minarai e Rekursus Naturais aloka tan osan hamutuk milliaun US$160. Tuir planu Governu nian to’o tinan 2016 projectu tasi mane estabeleisidu ona, tuir governu nia estimasaun katak depois de industria ne’e estabelesidu, governu sei hetan retornu husi industria ne’e hamutuk US$..../kada tinan

Atividade hirak ne’e, liu-liu ba projectu tasi mane nian: Industria Supply base, sei hala’o iha Distritu Covalima. Iha fulan Novembro 2012, Luta Hamutuk hahu rekolla dadus konaba atividade downstream nian no hala’o aktividade field visit hodi halo cross chek ba atividade Supply Base, Aeroporto no Nova Cidade..sst mak tuir planu sei harií iha Costa Sul nian ne’e

Tuir planu Governu Timor Leste, liu husi Ministerio Minarai e Rekursu Minerais iha Timor Leste (MPRM), sei hala’o industria ne’e iha parte Costa Sul nian

Iha planu ne’ebe mak Ministro Petroleu e Rekursu Minerais (MPRM) hato’o katak sei hahu buka meus hodi hari supply base ida iha Distritu Covalima-Suai atu nune’e bele fo apoiu maksimu ba atividade downstream-Minarai nian. Tamba ne’e V Governu RDTL liu husi MPRM hahu aloka ona orsamentu ba Projektu Tasi Mane, tuir fase mak hanesan:  Fase primeiru husi tinan 2011 to’o 2013: Governu aloka ona orsamentu hodi hari’i plataforma de abastecimento (fornese plataforma supply), Konstrusaun ba Porto Maritima nian, hodi harií mos Armazenamentu iha Suai, sei hahu ho Rehabilitasaun ba Aeroporto Suai no konstrusaun ba estrada ne’ebe liga entre Suku Camanasa ba Suai.

  

Situasaun real, industria supply Base!!!  

Realidade hatudu to’o agora la iha atividade dezenvolvimentu, bazeia ba workplan ne’e hela tinan 1(ida) tan hodi kompleta projektu sira ne’e hotu, maibe to’o agora seidauk iha sinal ne’ebé mak positivu husi Governu ba industria Supply base ne’e

Atu alkansa industria ne’e governu kontinua aloka orsamentu hodi finansia dezenvolvimentu projektu tasi mane, iha tinan 2012 ne’e aumenta tan US$162,8 milhoes. bazeia ba dadus hirak ne’e alokasaun orsaemntu ne’e tuir planu husi MPRM, sei hari’i fatin industria Supply base iha Camanasa, fatin ba Refinaria iha Bateno-Same no planta LNG iha Beasu-Viqueque no tuir Tuir work plan sei halo konstrusaun durante tinan 4 nia laran (2011-2015) maibe iha terenu to’o agora Kontrusaun fisiku seidauk iha no komunidade kontinua kestiona buat barak, (Oinsa sira nia partisipasaun iha Industria ne’e)?   

Planu governu Timor-Leste nian ba Implementasaun industria ne’e la dauk iha kordenasaun ne’ebé mak diak ho komunidade, seidauk iha estudu fundamentu ida konaba aspeito ekonomia, social no mos direitu humanu iha industria ne’e, ho ida ne’e iha preokupasaun husi Autoridade Lokal, Lia nain no joventude suku konaba sosializasaun tanba durante ne’e Governu la halao sosializasaun informasaun konaba industria ne’e ba iha komunidade nia let. Komunidade sira informa katak parte Governu liu husi MPRM seidauk hala’o sosializasaun diak ho komunidade sira, tamba to’o agora komunidade seidauk hetan informasaun ne’ebé klaru konaba sira nia uma fatin, natar, to’os no aihoris/plantasaun ne’ebé governu ba sukat ona

Seidauk iha sinal positivu husi servisu interministerial ne’ebé inisia husi Ministeriu Petroleu Rekursus Minerais (MPRM) hamutuk ho ministeriu sira seluk, seidauk iha planu husi ministeriu ida-idak hodi prepara rekursus humanu, liu-liu ba area sira nebe mak afeitadu ba mega projectu sira ne’e. Hanesan husi Ministeriu Argikultura e Peska la iha planu ne’ebé intergrade hodi prepara agrikultor sira iha suku Camanasa no mos suku sira seluk iha parte tasi mane nian ne’eb’e nudar area ba agrikultura nian, tanba rai sira ne’ebé faz parte tama iha area industria ne’e rai mak bokur no serve ba area agrikultura. No mos parte Ministeriu Edukasaun nia preparasaun hodi prepara rekursu humanu mak kualidade nune’e bele partisipa iha industria minarai nian ne’e, to’o agora seidauk hatene didiak planu husi ministeriu relevante. 

Sosializasaun informasaun nudar pratika husi transparensia no akuntabilidade ba industria Mega projectu Tasi Mane!!!

  

Sosializasaun informasaun konaba industria tasi mane, ladauk lao ho maximu, tanba desiminsaun informasaun la dauk kobre ba iha suco sira ne’ebé mak afeitadu no mos seidauk hala’o estudu klean ba social-cultural iha fatin refere. MPRM hala’o deit estudu konaba tekniku nian no la hareé impaktu konaba Sosial-Kultural no mos oinsa atu promove turismu iha suku Suai-Camanasa

Paratika dezenvolvimentu ne’ebé mak sustentavel no diak, dezenvolvimentu ne’ebé mak bazeia ba aprosimasaun “community base advocacy” dezenvolvimentu industria ne’e tenke tau as partisipasuan komunidade iha industria ne’e, industria ne’e tenke iha antes projecsaun ba komunidade sira nia vida moris ba futuru nomos oinsa protesaun kultural iha area industria Minarai ne’e. Kestaun importante ba komunidade mak presiza iha konsultasaun bebeik nune’e bele konvense didiak komunidade, nune’e komunidade pronto simu no pronto satan impaktu negativu mak komunidade sei hasoru iha aban-bainrua nian.  

Referensia:

1.       Tratadu Tasi Timor, artigu 3

2.       Faktus Informasaun Luta Hamutuk, Vollume:……., tinan 2012. And ….??

3.       Livru OGE, Pg 4-5. Press Release Luta Hamutuk-data 05/10/2012

4.       Materia Apresentasaun Luta Hamutuk iha Seminar loron ida, konaba Projectu tasi mane, ne’ebé mak organiza husi TIMOR GAP EP ho HABURAS FONDATION, Comoro Has laran. (Orsamento Geral do Estado 2011, Annex 2.B, Dotaçãoes Orçamental para 2011, Fundo de Infrastructuras. Orsamento Geral do Estado 2012, Dotaçãoes Orçamental para 2012, Fundo de Infrastructuras)

5.       Annual coloquio KKFP 2012

6.       Livru OGE (Planu Orsamentu Geral Estadu), politika no prioridades IV no V Governu

7.       PEDN, pg 117 no 138

 

---

[1] Tratadu Tasi Timor, artigu 3

[2] Faktus Informasaun Luta Hamutuk, Vollume:91, tinan 2012. And intervista ho Presidente Autodidade National Petroleum (ANP)

[3] Livru OGE, Pg 4-5. Press Release Luta Hamutuk-data 05/10/2012

[4] Materia Apresentasaun Luta Hamutuk iha Seminar loron ida, konaba Projectu tasi mane, nebe mak organiza husi TIMOR GAP EP ho HABURAS FONDATION, Comoro Has laran. (Orsamento Geral do Estado 2011, Annex 2.B, Dotaçãoes Orçamental para 2011, Fundo de Infrastructuras. Orsamento Geral do Estado 2012, Dotaçãoes Orçamental para 2012, Fundo de Infrastructuras)

[5] Annual coloquio KKFP 2012

[6] Livru OGE (Planu Orsamentu Geral Estadu), politika no prioridades IV no V Governu

[7] PEDN, pg 117 no 138